Mininu di nha Guiné, bin ku udjus tristi ku manga di lagrimas
Mininu ku ropas rumpidu na kurpu sin sapatu na pé
Mininu yandadur pata na tchon na karmusa koitadesa
Bin nha mininu, nha kumpanher. Asin ku nsedu ba ma nka muda
Sintimentu du bu dur stan na nha corçon. Ntchora ku bô
Mininu ku na sol kinti kata diskansa, na buska un kinhon pa bariga
Mininu ku na distindi mon pa pidi un pés na prasa kansadu sin speransa
Mininu du nha tabanca abo i gueriadur garandi fidju di bulanha
Na kil dia di kasabi bu kata tene di papia son tchora kta matau
Omis ta fasiu tadjadera na kampu di guera politikus ta usa bu nomi afuam
Bu dedus mungutidu na pidi simolas ku pé nhati na alkatron di Bissau
Omis corçon nudus kata pensa na bô nin na bu futuru. Nha mininu!
Bu ka tene tetu abo i orfon, bu ka tene nada bu sperança lebadu!
Nha mininu nha ermon di corçon kambanta bu mon na nha kosta
Nha mininu. Pa nlambuw ku mon balenti pa npembiu na nha ragas
Pa nbambuw ku nha bam-ba-ran di padida di dus mama!
Nha fidju tchon di Cabral ku borgonha di papendadi bin no bâi
Bin no yanda djuntu na kaminhus di purdon ku union di mamandadi
Bin, mininusinhu bin ka bu kansa yanda konsolo na bin pa bô
Bin ku mi djuntu pa limpa rostu di padidas ku kansa tchora!
Bin mininu di nha Terra pa lantanda nô Terra un bias pa sempri!
Valdir da Silva
Sem comentários:
Enviar um comentário